يوم جديد بعد ما سالا وقت ليمون وجبدت صريفة لا بأس بها ، كان خصني نبحث على عمل جديد لي نكمل بيه الشهر ونص لي باقين فهذ الصيف ، أول مافقت صباح مشيت عد “المهيدي ” كان قالي الا بغيتي تخدم فالزعبول راه نديبانيك بشي صندوق غي جرب ، ترددت فالاول ، معمرني خدمت فيه وصعيب المسخوط “عامر شوك” مع ذلك مأنيليتش الفكرة ، داز نهار لول و الثاني ونا غفلحانوت تنعون الخوادري ، اللي ديما تيقولي غي خدم معايا راه نضبر عليك 😂عارفو غيتهلا فيا ولكن عارفو مغيتعاملش معاياكخدام وهدشي ماشي فصالح شخصيتي ومغيعونيش ، اضافة انني معزيش علي ندير نفس الروتين ، حاول معايا يقنعني أن الزعبول فيه الشوك وانا غولد المدرسة و”رهيف “😂، مع ذلك خديت قرار أنني صباح غنفيق بكري ونتوكل على الله ، قبل كان خاصني نمشي نكونفيرمي مع المهيدي باش يجيب ليا شي جوج صنيدقات ديال الزعبول نجربو بيهم السوق ، ونجسو النبض ديال هذ ولاد العبد😂، صافي كونفيرميت مع المهيدي ، ، ودرت مع واحد سيد ضريف يعطيني كروسة ديالو ، صباح فقت مع الستة ، ومشيت تنتسنا المهيدي يجس من سلا ، تلقتيت لو بديك كروسة تتغروط ” زيط زيط زيط”😂😂 غادي ومزك ، تلاقيت اسيدس مع المهيدي عطاني الصنيدقات ، نااااري ميمتي بان ليا شوك 😅 ونا نقول لمهيدي ” وايلي اصحبي حكهم معاك عد جيبهم ، قالي ونبقا غنبيعهم ليك ونعطك رباح 😂 المهم جبد دوك صنادق حدا واحد الكيوسك كينا واحد “التيرة ” 😂😂لي مفهمش هذ اللاخيرة هي عبارة عن بقعة أرضية رملية ، مشيت اسيدي سرقت لخوادري الشطابة من الحانوت الله يتقبل 😂 وبديت تنحك ، ناااري يديا كي ولاو ، المهم باقي كاع ماساليت لبريزونطاسيون ديال الكرووسة ، بدا بنادم تيجي ، هلي باغي خمسة ، عشرة ، ومع خوك معروف فولاد وجيه الي شافني تيسكت بالضحك ، قائلا ” قلبتيها زعبول ، ليمون سالا ” المهم داز النهار مكرفس ولكن بخير ، أول نهار جبدت مية وخمستاش درهم ، تشاراه عالام اخوتشي 😂 أول حاجة قلتها فخاطري هي الا كملت هاكا نقدر نحيد القيد 😂 ، دازت الايام و لوقيتا لي تنجي فيها لبيتي تاااليل تندوش وتنشد ورقة وتنبدا البلية ، متخافوش راه البلية ديال الكتابة ، كندون داكشي لي وقع كامل ، وخا منت تندوش الشوك كان مبرزطني بين الصباع ولد الهم 😂 ، كنت أول واحد فشاريع يخسر على الكليان عشرة دراهم ديال “المناديل ” لدرجة وليت تناخذ كليان ديال الباعة المنافسين ليا فالشارع بهذ الخطوة لي درت ، كنت ديما تنحاول ندخل مع الكليان ديالي لشي موضوع وهو تيقصي ، لدرجة والله العظيم متيسخاش يمشي بحالو ، وحد سيد ولا تيجي يونسني وتنبقاو هاضرين فمواضيع زوينة .
تجربة كانت صعيبة ومتعبة ولكن كانت مفيدة ليا ولشخصيتي ، قبل متفكر تكبر فالنعيم اللي غتوفرو ليك عائلتك ، وتحس براسك عيش وسط ماماك وباياك لي ممخلينك محتاج تالعبا ، فكر تخرج من تحت هذ الجناحين ، وتواجه العالم وتحدياتو ، تعلم تكون مناضل ، لأنك الا بقيتي فمنطقة الراحة غتكبر جبان ، وأي مشكل غطيح فيه ديما غيخسك ماماك وباباك ، تعلم تجيب درهم حلال سواء واقعيا أو عبر الانترنيت ، وخا كنفضل ان الحلاوة فالواقع واختلاطو مع الناس ونا جربتهوم بجوج وبصراحة ملقيتش فحال تجلويق ديال الواقع ، العقل والذكاء شي مرات تيعلمك الكسل والنمطية ، وهذشي لي مخاليني تنعاني دابا وخا الحمد لله خدام عبر الانترنيت ولكن تلقا واسي ممرتاحش بزااف حيتاش مخدم عقلي ومراني أون كونطاكط مع ناس لي غتستافد منهم مي ديما تيبقاو عملاء باغين حاجتهم وتيعطيوك رزقك وتيمشو ، المهم الخوت هدشي لي كاين ، حاولو ديرو كلشي ومتخليش شي تجربة دوز ومتستفدش منها ، صنع راسك براسك ، متخليهمش يصنعوك (على المستويين النفسي والمهني …)
تهلاو
